كنت احسبج للعهد والحب توفين

عدد الرسائل : 141 تاريخ التسجيل : 20/05/2007

لا ردج الله لا ولا اطلب تردين ،، ادعي عليج بعثرة في صلاتي ،،

عثرة تشلج مابعدها تقومين ،، ياللي نقضتي عهودنا الماضياتي ،،

خدان لج بالقلب كانت بساتين ،، وريضان وغصون بها يانعاتي ،،

كانت تروح الروح ساعة تروحين ،، وتعاف نفسي شربها والمقاتي ،،

وكنتي منات القلب والروح والعين ،، والعين عينج يعلها ماتباتي ،،

كنت احسبج للعهد والحب توفين ،، قلتي الغدر بالحب ماهو سواتي ،،

وبان الغدر سم جرى بالشرايين ،، الله عسى يسقيج سم الفعاتي ،،

كل سقيتج حب واليوم تنسين ،، تقولين حلم ايام واليوم فاتي ،،

وخذتي الهوى لعبة على ماتحبين ،، الين عصفت بالهوى عاصفاتي ،،

وصرتي بشعري في العذارى تباهين ،، تقولين انا شمس العصر في حلاتي ،،

وبالشعر صورتج خزام ورياحين ،، واثرج هضاب وشووك مابه هداتي ،،

وبالشعر غاليتج على كل غاليين ،، واثرج دنية تتبعين الدناتي ،،

رسمتج سحابة خير قطر تنفين ،، فزت لج الصحراء زهور ونباتي ،،

رسمتج مهات للجميلات تقودين ،، واثرج خروف ضيعته الرعاتي ،،

توسلت على حب عامين ،، عامين لكن في حسابي مئاتي ،،

ناديت لكني ابد ماتسمعين ،، عمري وروحي والفكر في شتاتي ،،

وخنتي وبعتي كل عهد ويمين ،، ماعاد يفرق بين ماضي وآتي ،،

وصرتي مثل غيرج برخص تبيعين ،، يا مرخصتني مابقالج غلاتي ،،

تحسبين انج بالمها فات ترقين ،، كيف الصعود يكون للهاويتي ،،

والنوق من تخرس فلا يفيد تمرين ،، مايفيدها قلص وضرب العصاتي ،،

ومع ناقة خرسا تكلفت سنتين ،، فلا نالت بشدة ولا بالهداتي ،،

اسبوع في دوامي ولاعلي غير يومين ،، ويوم اوصل الدار اتصل واحاتي ،،

صبري نفذ واليوم ثارت براكين ،، مظلوم انا وباجر تحل دعواتي ،،

سمعي عسى من بعدها تسمعين ،، سمعي دعا من صار قلبه بحصاتي ،،

عساج عوق منه ماعاد تبرين ،، عوق تشاافق له قلوب عداتي ،،

ادعي عسى من ناظج ماتشووفين ،، وتطحن بج الايام طحن الرحاتي ،،

ويالله عسى يحتار فيج المداوين ،، تبين الممات ولا يجيج المماتي ،،

ويالله عسى كف الندامة تعضين ،، تندمين يوم انه يفوت الفواتي ،،

وتبكين دم يسيل من مقلة العين ،، ويحتار قلبج من عناج وتعاتي ،،

وعسى ماتلاقي منه القلب تهدين ،، وان هو حصل ادعي عساج الشتاتي ،،

يا بلوة في وسط بيته تعيشين ،، غافي وحوله شب جمر الغضاتي ،،

عسى بعمرج ساعة ماتتهنين ،، وتمضي حياتج بين هم وشقاتي ،،

يابنت قلبي وين مثله تلاقين ،، قلب عطاج الحب ماقال هاتي ،،

ياتيج روحي شلتها لج بكفين ،، وفي التالية رمح الخيانة جزاتي ،،

يالله عساج النار يا ام ويهيين ،، كل انكشف لا ماتفيد العباتي ،،

ويا الله عسى تلبسج جن وشياطين ،، وتكونين مدعاة الحكي والشماتي ،،

والله ماني منتظر قلبج يليين ،، والمجبلات اكثر من الفايتاتي ،،

وماعادتي اتبع ظعون المقفين ،، ريح تشل دعونج المقفياتي ،،

يا ليلة ظلما على الله تزولين ،، وتاتي ليالي سعدنا مشرقاتي ،،

ويا حية رقطا تقود الثعابين ،، باجر تحل ايام المعتماتي ،،

يا ظالمة نفسج ترى الدهر يومين ،، يوم النجاة ويوم مابه نجاتي ،،

بيني وبينج تحكم ايام وسنين ،، وانا شاهدي قلب من الغدر ماتي ،،

لو كان عذرج في كفوف الموازين ،، لا كان ربح كل غدر البناتي ،،

ويا دمعة التمساح لالا تذرفين ،، لعيون رهن دموعها كاذباتي ،،

لا ما عرفتي الحب لا ماتحسين ،، وغدرج تعدى غدر ذيب الفلاتي ،،

الذيب يعوي قبل يغدر بمسكين ،، وانتي غدرتي خافقي في سباتي ،،

وانتي السبب سقتي على القلب جرحين ،، غدر الغرام و موجع الذكرياتي ،،

وانتي السبب لالا تلومين ،، وان ياج باجر شوفي شلون ياتي،،

والله لا اكتب وافضحج في دواويين ،، وارزف واغني يوم خبر الوفاتي ،،

وارسم لأهل العشق قلب وسهمين ،، وقصة خيانة ماروتها الرواتي ،،

ويمين لأنشر فوق اسمج عناويين ،، واشهرج من قاصي اليمن للفراتي ،،

ومن غرب هالدنيا الى قاصي الصين ،، ديوان غدر فيه كل اللغاتي ،،

والبادي أظلم سنة العين بالعين ،، وان لافاها لاعادتي ولاصفاتي ،،

وياشبه انسانة براس ورجلين ،،اعوذ بالرحمن منج في صلاتي

المدير عدد الرسائل : 72 تاريخ التسجيل : 12/05/2007

صح ألسانك شاعرنا وأنا أفتخر فيك والله

مشكوووووووووور

عدد الرسائل : 141 تاريخ التسجيل : 20/05/2007

صح بدنك اخويه والله الفخر يوم اكون من بينكم ونحن عضايد

وتسلم على مرورك الطيب

عدد الرسائل : 203 تاريخ التسجيل : 18/05/2007

تسلم اخوي امممممممممممم شكلك معصب يوم كتبت القصيده مطلعها من قلبك هههههههههههههه لووووووووول امزح ومشكور على القصيده

عدد الرسائل : 347 تاريخ التسجيل : 20/05/2007

والله لا اكتب وافضحج في دواويين ،، وارزف واغني يوم خبر الوفاتي ،،

وارسم لأهل العشق قلب وسهمين ،، وقصة خيانة ماروتها الرواتي ،،

ويمين لأنشر فوق اسمج عناويين ،، واشهرج من قاصي اليمن للفراتي ،،

ومن غرب هالدنيا الى قاصي الصين ،، ديوان غدر فيه كل اللغاتي ،،

والبادي أظلم سنة العين بالعين ،، وان لافاها لاعادتي ولاصفاتي ،،

وياشبه انسانة براس ورجلين ،،اعوذ بالرحمن منج في صلاتي

صح اللسانك اخوي
وربي كلمات يصعب الرد عليها مرررررررره

لاهنت ياخوي وعسى ايامك الجايه كلها سعاده وخير

عدد الرسائل : 141 تاريخ التسجيل : 20/05/2007

ايه والله ياخويه من القلب وتسلم على مرورك الطيب

واختي رفيعة الشان وياج يارب وماقصرتي على المرور الطيب وكل الاخوان

ربي يحفظكم

عدد الرسائل : 115 تاريخ التسجيل : 18/05/2007

صح ألسانك الشيخ ^ـــــــــ^